തൊടുപുഴ: മോഹിപ്പിക്കുന്ന മനോഹാരിതയിൽ നിന്നും മരണക്കയത്തിലേയ്ക്ക് മലങ്കര ജലാശയം അനിലിനെ കൊണ്ടു പോയത് നിമിഷങ്ങളുടെ വ്യത്യാസത്തിലാണ്. ജലാശയത്തിന്റെ മനോഹാരിതയ്‌ക്കൊപ്പം ഫോട്ടോയ്ക്ക് പോസ് ചെയ്തു കൊണ്ടിരുന്ന അനിലിനെ കുറച്ചു നിമിഷങ്ങൾക്കം അതേ ജലാശയം തന്നെ തന്റെ ചതിക്കുഴിയിലേയ്ക്ക് വിഴുങ്ങുകയായിരുന്നു.
ഫോണിൽ അനിലിന്റെ ചിത്രങ്ങളൊക്കെയെടുത്ത ശേഷം സുഹൃത്ത്‌ അരുൺ വസ്ത്രം മാറാനായി കാർ പാർക്ക് ചെയ്തിരുന്ന സ്ഥലത്തേക്ക് പോയി. ഈ സമയം ഒന്ന് തല നനച്ചിട്ട് വരാമെന്ന് വിനോദിനോട് പറഞ്ഞ് അനിൽ വീണ്ടും വെള്ളത്തിലേക്ക് ഇറങ്ങുകയായിരുന്നു. എന്നാൽ കാൽ ചെളിയിൽ പൂണ്ട് നിലതെറ്റി അനിൽ കയത്തിലകപ്പെടുകയായിരുന്നു. അതോടെ അവസാന നിമിഷങ്ങൾക്ക് തൊട്ടുമുമ്പുള്ള അ ചിത്രങ്ങൾ വേദനിപ്പിക്കുന്ന കണ്ണീരടയാളങ്ങളായി മാറുകയായിരുന്നു.
മലങ്കര ഡാമില്‍ നിന്നുള്ള ചിത്രം
ഷൂട്ടിംഗ് ഇല്ലാതിരുന്ന രണ്ടു ദിവസങ്ങൾ
24, 25 തീയതികളിൽ അനിലിന് ഷൂട്ടിംഗില്ലായിരുന്നു. തുടർന്ന് തിരുവനന്തപുരത്തും കൊട്ടാക്കരയുമുള്ള സുഹൃത്തുക്കളായ കാമറാമാൻ വിനോദും പൊതുപ്രവർത്തകനായ അരുണും പാലായിലെത്തിയതറിഞ്ഞ് ഇവരെ അനിൽ തൊടുപുഴയ്ക്ക് വിളിച്ചുവരുത്തുകയായിരുന്നു. വെള്ളിയാഴ്ച വൈകിട്ട് തൊടുപുഴയിലെത്തിയ ഇവർക്കൊപ്പം ക്രിസ്മസ് ആഘോഷിക്കാൻ അനിൽ മലങ്കരയിലേക്ക് തിരിച്ചു. നാലരയോടെ തൊടുപുഴയിൽ നിന്ന് എട്ട് കിലോമീറ്റർ അകലെയുള്ള മലങ്കര ടൂറിസം ഹബിലെത്തിയ ഇവർ സമീപത്തെ ഒരു ചെറിയ കടവിൽ കുളിക്കാൻ തീരുമാനിക്കുകയായിരുന്നു. അരുണും അനിലും മാത്രമാണ് വെള്ളത്തിലിറങ്ങിയത്. പലവട്ടം ജലാശയത്തിന്റെ നടുവിലേക്ക് നീന്താൻ ശ്രമിച്ച അനിലിനെ തങ്ങൾ തടഞ്ഞിരുന്നെന്ന് വിനോദ് പറയുന്നു.
